Cole Palmer, hinn ungi enski landsliðsmaður hjá Chelsea, á von á harkalegum móttökum þegar hann mætir með liði sínu á Anfield til að spila gegn Liverpool í í úrvalsdeildinni í fyrsta leik liðanna eftir landsleikjahléið í fótboltanum.
Þetta segir Gary Neville, knattspyrnusérfræðingur og fyrrverandi bakvörður Manchester United, en hann ræddi við NBC Sports um stórleik Liverpool og Chelsea sem eru í fyrsta og fjórða sæti deildarinnar að sjö umferðum loknum.
Palmer hefur þegar skorað sex mörk og lagt upp fimm í níu mótsleikjum Chelsea á þessu tímabili og margir telja hann besta leikmann deildarinnar þessa dagana. Neville segir að leikurinn á Anfield verði stórt próf fyrir Palmer.
„Þú færð hvergi minna pláss til að athafna þig en á Anfield, þar er erfiðast að spila. Leikmenn Liverpool munu spila mjög fast á móti honum og reyna að sjá til þess strax frá byrjun að hann nái sér ekki á strik.
Á Anfield máttu alltaf búast við því að vera tekinn dálítið í gegn, af áhorfendum og andrúmsloftinu á vellinum. Ég man alltaf eftir þeim leikjum sem ég spilaði á Anfield, það voru erfiðustu leikirnir. Fyrir lið Chelsea undir stjórn Enzo Maresca verður þetta gríðarleg áskorun og það verður mjög áhugavert að sjá hvernig því gengur,“ sagði Gary Neville.