Held að þú sért með mig á heilanum

Mohamed Salah svaraði í kvöld ummælum Jamie Carraghers um stöðuna í samningsmálum Egyptans við enska knattspyrnufélagið Liverpool.

Carragher, sem sjálfur lék allan sinn feril með Liverpool, er sérfræðingur hjá Sky Sports og hefur rætt mikið um stöðu mála hjá Salah sem getur farið frá félaginu án greiðslu í sumar.

Í þættinum í kvöld sagði Carragher að þeir Mo Salah og Trent Alexander-Arnold gætu tekið Virgil van Dijk sér til fyrirmyndar en þessir þrír gætu allir farið frá félaginu án greiðslu í sumar.

Eftir umræður um stöðuna fyrir þáttinn Monday Night Football í kvöld skrifaði Salah á samfélagsmiðilinn X: „Ég er farinn að halda að þú sért með mig á heilanum.“

Carragher svaraði honum strax og sagði: „Ég hef alltaf verið með þig á heilanum, Mo Salah, og vonandi held ég því áfram á næsta tímabili.“

• Blogga um frétt