Verulega ósáttur við Blackburn

Knattspyrnumanninum Arnóri Sigurðssyni var tilkynnt í morgun að hann væri ekki á 25-manna leikmannalista Blackburn Rovers fyrir síðari hluta tímabilsins í ensku B-deildinni.

Í samtali við Vísi sagði Skagamaðurinn að ákvörðunin hefði komið flatt upp á hann. Arnór kvaðst þar ósáttur við tímasetninguna, ekki síst þar sem félagaskiptaglugganum í janúar hefur verið lokað og möguleikarnir því ekki jafn margir fyrir hann til þess að leita annað.

Frétt af mbl.is

Skagamaðurinn tekinn af leikmannalistanum

„Fyrst og fremst finnst mér það bara óheiðar­legt hjá félaginu, hvernig þeir gera þetta. Ég hef alltaf verið fag­maður í þessu, alltaf gefið mig allt mitt í þetta fyrir félagið en síðan ákveða þeir að gera þetta svona.

Bíða eftir að félag­skipta­glugginn lokar og til­kynna mér þetta svo. Þeir setja mig í ómögu­lega stöðu. Ég er að renna út á samning eftir tíma­bilið og er búinn að vera meiddur. Það er kannski auðvelt að henda manni burt þegar að maður ætlar ekki að endur­semja,“ sagði Arnór við Vísi.

Arnór í leik með Blackburn. AFP/Glyn Kirk

Eitthvað sem ég þarf að skoða

Samningur hans rennur út í sumar og hefur Arnór því spilað sinn síðasta leik fyrir liðið. Kantmaðurinn hefur aðeins náð að spila fimm leiki fyrir Blackburn á tímabilinu vegna veikinda og svo meiðsla og getur brátt hafið æfingar að nýju.

„Það eru ein­hverjir félags­skipta­gluggar opnir en það er bara eitt­hvað sem ég þarf að skoða. Eins og staðan er núna er ég ekki að pæla í neinu öðru en að ná mér heilum,“ bætti Arnór við.

• Blogga um frétt