Liverpool tapaði tíu milljörðum

Enska knattspyrnufélagið Liverpool tapaði 57 milljónum punda, jafnvirði 10,1 milljarði íslenskra króna, fyrir skatt á tímabilinu 2023-24.

Tapið er 48 milljónum meira en tímabilið á undan þegar það nam níu milljónum punda. Þrátt fyrir það hækkuðu heildartekjur félagsins umtalsvert, eða um 20 milljónir punda, 3,5 milljarða króna.

Ástæðuna fyrir tapinu má helst rekja til þess að Liverpool keypti fjóra leikmenn fyrir tímabilið, miðjumennina Dominik Szoboszlai, Alexis Mac Allister, Ryan Gravenberch og Wataru Endo, auk þess sem vinna við endurnýjun á áhorfendastúkunni á Anfield-leikvanginum kostaði sitt.

Heildartekjurnar voru 614 milljónir punda fyrir sama tímabil, eða 108,9 milljarðar króna. Þá fóru auglýsingatekjur Liverpool yfir 300 milljónir punda í fyrsta sinn. Sú upphæð var 308 milljónir punda, sem nemur 54,5 milljörðum króna.

• Blogga um frétt