Newcastle er enskur deildabikarmeistari í fyrsta skipti í sögunni eftir verðskuldaðan sigur á Liverpool í úrslitaleik keppninnar á Wembley-leikvanginum í London, 2:1.
Þetta er fyrsti stóri titill Newcastle í heil 70 ár og fögnuður leikmanna og stuðningsfólks var gríðarlegur þegar flautað var til leiksloka.
Eftir tiltölulega tíðindalítinn fyrri hálfleik þar sem Newcastle var sterkari aðilinn skoraði varnarmaðurinn Dan Burn fyrir Newcastle á lokamínútunni með skalla eftir hornspyrnu frá Kieran Trippier, 1:0.
Liverpool fékk í kjölfarið sitt fyrsta og eina færi í fyrri hálfleik en Diogo Jota skaut langt framhjá marki Newcastle þegar hann hitti boltann illa rétt utan markteigs.
Newcastle komst síðan í 2:0 á 53. mínútu þegar Tino Livramento sendi fyrir mark Liverpool frá vinstri, Jacob Murphy skallaði boltann fyrir fætur Alexanders Isaks sem afgreiddi boltann í vinstra hornið.
Engu munaði að Newcastle skoraði þriðja markið á 64. mínútu þegar Caoimhín Kelleher varði frá Alexander Isak af stuttu færi. Newcastle var þarna orðið mun líklegra til að bæta við mörkum en Liverpool að minnka muninn.
Liverpool náði loks upp einhverjum sóknarþunga á lokakafla leiksins en skapaði sér engin opin færi gegn baráttuglöðum leikmönnum Newcastle.
En á fjórðu mínútu uppbótartímans, af átta, fékk Federico Chiesa boltann í gegnum miðja vörn Newcastle frá Harvey Elliott og minnkaði muninn í 2:1. Markið var fyrst dæmt af vegna meintrar rangstöðu, en síðan kom í ljós að það var ekki rétt og markið stóð.
Newcastle tókst að standa síðustu mínúturnar af sér og Liverpool fékk ekki færi til að jafna metin.