Newcastle niðurlægði United

Newcastle vann góðan 4:1 sig­ur á liði Manchester United á St James Park í ensku úr­vals­deild­inni í dag. Har­vey Barnes gerði tvö mörk fyr­ir Newcastle í leikn­um og þeir Sandro Tonali og Bruno Guim­araes gerðu eitt mark hvor. Al­ej­andro Garnacho skoraði mark Manchester United.

Með sigr­in­um er Newcastle komið í fjórða sæti deild­ar­inn­ar og þar með í Meist­ara­deild­ar­sæti og liðið á leik til góða á hin liðin sem eru í bar­átt­unni um þriðja, fjórða og fimmta sætið í deild­inni en efstu fimm sæt­in í deild­inni gefa sæti í Meist­ara­deild Evr­ópu á næsta tíma­bili.

Heima­menn byrjuðu leik­inn með lát­um og strax á fyrstu mín­útu leiks­ins komst Jacob Murp­hy í góða stöðu á hægri kant­in­um og átti góða send­ingu fyr­ir markið en Victor Lindelöf kom bolt­an­um frá á síðustu stundu. Það munaði samt litlu að gest­irn­ir kæm­ust yfir á 12. mín­útu leiks­ins en þá spiluðu Jos­hua Zirkzee og Bruno Fern­and­es sig í gegn­um vörn Newcastle og átti Zirkzee fínt skot sem Nick Pope varði vel frá hon­um.

Liðsmenn Newcastle fagna marki Sandro Tonali í dag. AFP/​Andy Buchan­an

Það gerðist svo á 24. mín­útu leiks­ins að Newcastle komst yfir en þá reyndu leik­menn Manchester United að spila sig út úr pressu heima­manna en það fór ekki vel. Kier­an Tripp­er náði bolt­an­um og átti fasta send­ingu á Al­ex­and­er Isak sem lyfti bolt­an­um skemmti­lega á Sandro Tonali og hann hamraði bolt­an­um inn af stuttu færi. Fjór­um mín­út­um síðar var Tonali ná­lægt því að koma Newcastle 2:0 en skot hans fór rétt fram­hjá.

Sókn­ar­lega var ekki mikið að ger­ast hjá Manchester United í fyrri hálfleik en þeir náðu engu að síður að jafna met­in á 37. mín­útu en þá vann Manu­el Ug­ar­te bolt­ann af Joel­int­on á miðjum vall­ar­helm­ingi Manchester United og kom bolt­an­um á Di­ogo Dalot sem brunaði upp völl­inn og átti fína sendngu á Al­ej­andro Garnacho sem náði skoti á markð sem var alls ekki svo fast en það var ná­kvæmt því bolt­inn fór í stöng­ina og inn.

Al­ej­andro Garnacho og Bruno Fern­and­es fagna marki þess fyrr­nefnda í dag. AFP/​Andy Buchan­an

Leik­menn Newcastle byrjuðu seinni hálfleik­inn mjög vel og voru fljót­ir að kom­ast yfir. Tino Livra­mento átti fín­an sprett upp vinstri kant­inn á 49. mín­útu leiks­ins, fór auðveld­lega fram­hjá Di­ogo Dalot og setti bolt­ann fyr­ir markið en bolt­inn virt­ist vera á leiðinni útaf en á síðustu stundu kom Jacob Murp­hy á ferðinni og náði að negla bolt­an­um fyr­ir markið og þar kom Har­vey Barnes á ferðinni og setti bolt­ann í netið af stuttu færi. Staðan orðin 2:1 og mik­il gleði á St James Park.

Gleðin varð ennþá meiri hjá heima­mönn­um á 64. mín­útu en þá rann Noussa­ir Mazra­oui á rass­inn á miðjum vall­ar­helm­ingi Manchester United og Har­vey Barnes tók af hon­um bolt­ann og tók sprett­inn að marki setti bolt­ann smekk­lega fram­hjá Altay Bay­ind­ir í marki Manchester United og kom Newcastle í 3:1.

Bruno Guim­araes fagn­ar með stuðnings­mönn­um Newcastle eft­ir mark sitt í dag. AFP/​Andy Buchan­an

Á 77. mín­útu leiks­ins var svo komið að Altay Bay­ind­ir að gefa heima­mönn­um mark en þá átti hann mis­heppnaða send­ingu upp völl­inn sem rataði beint á Joel­int­on en hann skallaði bolt­ann á Bruno Guim­araes sem setti bolt­ann í netið og kom Newcastle í 4:1. Það gerðist lítið eft­ir þetta og ör­ugg­ur sig­ur Newcastle staðreynd.

Þessi úr­slit þýða að Newcastle er komið í fjórða sæti deild­ar­inn­ar með 56 stig og á leik til góða á Manchester City, Chel­sea og Ast­on Villa sem koma í næstu sæt­um á eft­ir. Manchester United er í 14. sæti deild­ar­inn­ar eft­ir þetta tap með 38 stig.

Næsti leik­ur Newcastle er heima­leik­ur gegn Crystal Palace á miðviku­dag­inn en þetta er leik­ur sem var frestað þegar Newcastle spilaði til úr­slita í enska deild­ar­bik­arn­um um miðjan mars. Næsta laug­ar­dag spil­ar liðið svo við Ast­on Villa á Villa Park í Bir­ming­ham.

Manchester United á leik á fimmtu­dag­inn en þá leik­ur liðið við Lyon í Evr­ópu­deild­inni á Old Trafford  en það er seinni leik­ur liðanna í 8-liða úr­slit­um. Fyrri leik liðanna fór 2:2. Manchester United mæt­ir svo Wol­ves á Old Trafford í ensku úr­vals­deild­inni á sunnu­dag­inn.

Newcastle	4:1	Man. United	Opna lýs­ingu Loka
90. mín. Bruno Fern­and­es (Man. United) á skalla sem fer fram­hjá Skalli fram­hjá.
Augna­blik — sæki gögn...

• Blogga um frétt