Íþróttir | Rafíþróttir | mbl | 19.3.2023 | 9:09 | Uppfært 20.3.2023 9:38

Rekur upphafið til ömmu sinnar

Ólafur Hrafn Steinarsson hefur verið einn helsti talsmaður rafíþrótta á Íslandi en þess má geta að hann er fyrrverandi formaður RÍSÍ og stofnaði þar að auki Esports Coaching Academy fyrir um ári síðan.

Í nýjasta Settöpp-þættinum fer Ólafur um býsna víðan völl og skýrir frá því hvað ECA er í raun og veru og deilir persónulegri reynslu sinni af tölvuleikjum og hvernig ferill hans hófst.

mbl.is/Kristófer Liljar

Byggja upp flotta einstaklinga

ECA á vera eins konar þjálfunartól fyrir þjálfara þar sem þeir hljóta ákveðna menntun til þess að vera betur í stakk búnir að þjálfa aðra í rafíþróttum.

„Í tölvuleikjum, þá hefur kannski enginn tekið þessa vinnu og gert hana almennilega,“ segir Ólafur og vísar þá í hvernig mismunandi æfingar gagnast mismunandi íþróttum. Hjá ECA er verið að þróa þjálfunaraðferðir í rafíþróttum svo þær skili góðum árangri.

„Þetta á að snúast um að ná mikilli þátttöku, skila jákvæðum boðskap, búa til góðar venjur, rútínur og byggja upp flotta einstaklinga.“

Ólafur Hrafn Steinarsson, fyrrverandi formaður RÍSÍ og stofnandi Esports Coaching Academy, ECA. mbl.is/Kristófer Liljar

Amma lét afa kaupa tölvuleiki

Áhugi Ólafs og metnaður fyrir rafíþróttum á sér djúpar rætur, en hann kynntist tölvuleikjum upprunalega í gegnum ömmu sína þegar hann var á barnsaldri.

Síðan þá hafa tölvuleikir margoft spilað stórt hlutverk í lífi hans, eins og þegar fráfall föður hans bar að, eða þegar hann átti við félagslegan vanda að stríða.

„Ég kynnist tölvuleikjum þegar amma mín er að kenna mér á Doktor Mario og Super Mario Bros,“ segir Ólafur og bætir við að hún hafi alltaf látið afa kaupa tölvur og tölvuleiki þegar hann var úti á sjó.

Í spilaranum hér efst í fréttinni er hægt að horfa á þáttinn í heild sinni og heyra þar fjölmargt annað áhugavert.