Ítalski knattspyrnumaðurinn Marco Curto hefur verið úrskurðaður í tíu leikja bann af FIFA fyrir kynþáttaníð í garð Hee-chan Hwang framherja Wolves.
Fimm af leikjunum tíu eru skilorðsbundnir í tvö ár. Curto, sem er nú að láni hjá Cesena í heimalandinu frá Como, gerðist sekur um níðið í vináttuleik Como og Wolves á Marbella í júlí.
Knattspyrnusamband Suður-Kóreu hafði samband við FIFA vegna atviksins. Sky segir forráðamenn Wolves sátta við niðurstöðuna, en Como gerði lítið úr því strax í kjölfarið.
Samkvæmt Curto sjálfum sagði hann við samherja að Hwang væri eins og Jackie Chan og hafði því ekki beint níðinu beint að leikmanninum sjálfum.