Fyrrverandi leikmaður ÍBV fannst látinn

Gríski knattspyrnumaðurinn George Baldock, sem fæddist og ólst upp á Englandi, er látinn aðeins 31 árs. Baldock fannst látinn í sundlaug á heimili sínu í Glyfada í Aþenu í dag.

Hann gekk til liðs við Panathinaikos í sumar eftir sjö ára dvöl hjá Sheffield United þar sem Baldock lék til að mynda þrjú tímabil í ensku úrvalsdeildinni.

Hjá Panathinaikos var hann samherji Sverris Inga Ingasonar og Harðar Björgvins Magnússonar og lék nokkrum sinnum með þeim fyrrnefnda en Hörður er að jafna sig á meiðslum.

Síðast lék hann við hlið Sverris í vörn Panathinaikos í stórleik gegn nágrönnunum í Olympiacos á sunnudagskvöldið.

Sumarið 2012 lék Baldock með ÍBV í úrvalsdeildinni hér á landi að láni frá Milton Keynes Dons, undir stjórn Magnúsar Gylfasonar, og stóð sig einkar vel. Hann lék 16 leiki með Eyjaliðinu í deildinni, alla í byrjunarliðinu, og skoraði eitt mark, í sigurleik gegn Grindavík, 3:1.

Alls lék hann tólf A-landsleiki fyrir Grikkland, þann síðasta gegn Georgíu í mars, í úrslitaleik þjóðanna í umspili um sæti á EM í Þýskalandi í sumar.

• Blogga um frétt