Ísak skoraði enn einu sinni

Landsliðsmaðurinn Ísak Bergmann Jóhannesson skoraði mark Fortuna Düsseldorf í tapi fyrir Greuther Fürth, 2:1, á heimavelli í þýsku B-deildinni í fótbolta í Düsseldorf í kvöld. 

Ísak er kominn með níu mörk og þrjár stoðsendingar í 23 leikjum í deildinni.

Eftir leik er Düsseldorf í 6. sæti deildarinnar með 38 stig, en liðið missteig sig í æsispennandi toppbaráttu. 

Ísak lék allan leikinn og kom Düsseldorf yfir á 8. mínútu. Valgeir Lunddal Friðriksson var þá í byrjunarliði Düsseldorf en fór af velli þegar korter var eftir. 

Hólmbert Aron Friðjónsson kom þá inn á seint í tapi Preussen Münster fyrir Schalke, 1:0, í Gelsenkirchen í kvöld. 

Münster-liðið er í 15. sæti deildarinnar með 23 stig. 

• Blogga um frétt