Írski bardagakappinn Conor McGregor hefur opinberað að meiðsli á tá hafi orðið þess valdandi að hann þurfti að hætta við fyrirhugaðan bardaga sinn við Michael Chandler í UFC í blönduðum bardagalistum.
Bardaganum, sem átti að fara fram þann 29. júní næstkomandi í Las Vegas í Bandaríkjunum, var aflýst fyrir viku síðan og uppgefin ástæða var meiðsli McGregors, án þess að nánar væri farið út í þau.
Írinn keppti síðast í UFC árið 2021 þegar hann fótbrotnaði í bardaga gegn Dustin Poirier.
Í færslu á Instagramaðgangi sínum í dag greindi McGregor frá því að hann væri tábrotinn og gæti því ekki barist.