„Þetta getur verið vandmeðfarið, þegar maður lítur um öxl,“ sagði Guðni Th. Jóhannesson, forseti Íslands, í Fyrsta sætinu.
Guðni var kjörinn forseti Íslands í júní árið 2016 og tók formlega við embættinu hinn 1. ágúst sama ár en hann er mikill íþróttaáhugamaður og stundaði sjálfur handbolta og blak lengi vel.
Guðni hefur verið tíður gestur á Laugardalsvelli frá því hann tók við embætti og hann rifjaði upp skemmtilega sögu frá leik karlalandsliðsins í síðustu undankeppni.
„Þú færð að fylgjast með liðunum, á þeim forsendum að þú sért í því embætti sem þú ert í,“ sagði Guðni.
„Ég lenti í því hérna heima á Laugardalsvelli, þar sem ég fékk að taka son minn með mér. Við skoruðum sigurmark á lokamínútunni og strákurinn minn fagnaði ógurlega, við hliðina á formanni knattspyrnusambandsins sem í hlut átti.
Ég varð að biðja strákinn um að róa sig. Maður þarf stundum að passa sig og ég sagði honum að við værum hérna í ákveðnu hlutverki og þó mann dauðlangi stundum að fagna eins og vitleysingur þá verðum við að hafa hemil á okkur,“ sagði Guðni meðal annars.