Mæðgur deildu saman dýrmætu augnabliki

Lyftingakonan Eygló Fanndal Sturludóttir náði frábærum árangri á Evrópumóti U23-ára í ólympískum lyftingum í Razyn í Póllandi í vikunni.

Eygló varð Evrópumeistari í 71kg flokki og vann til þrennra gullverðlauna á mótinu en hún setti nýtt Norðurlandamet í fullorðinsflokki í samanlögðum árangri þegar hún lyfti 104 kílógrömmum í snörun og 133 kílógrömmum í jafnhendingu. Eygló átti sjálf Norðurlandametið en hún bætti gamla metið um eitt kílógramm.

Frétt af mbl.is

Eygló þrefaldur Evrópumeistari

„Mér líður ótrúlega vel eftir þetta allt saman og ég er mjög sátt með þennan árangur,“ sagði Eygló í samtali við Morgunblaðið.

Dýrmætt augnablik

Til að toppa verðlaunaafhendinguna afhenti móðir Eyglóar, Harpa Þorláksdóttir, henni svo gullverðlaunin á verðlaunapallinum.

„Ég hafði ekki hugmynd um það að mamma myndi afhenda mér gullverðlaunin fyrr en við vorum að ganga út á sviðið. Hún var allt í einu mætt baksviðs sem mér fannst frekar óvænt en svo áttaði ég mig á því hvað væri í gangi. Það var ótrúlega gaman þegar hún hengdi verðlaunapeninginn um hálsinn á mér og mjög dýrmætt augnablik. Hún var meyr þegar þjóðsöngurinn var leikinn, ég tók vel eftir því.“ 

Viðtalið má sjá í heild sinni á íþróttasíðum Morgunblaðsins í dag.

Eygló Fanndal Sturludóttir á Evrópumótinu í Razyn. Ljósmynd/Gregor Winters