Neitaði að skipta um buxur og hætti keppni

Magnus Carlsen, fimmfaldur heimsmeistari í skák, hætti keppni á heimsmeistaramóti í New York-borg í Bandaríkjunum vegna þess að honum var skipað að skipta um buxur.

Carlsen var beðinn um að skipta um buxur á heimsmeistaramótinu í hraðskák og atskák í gær en skákmeistarinn norski klæddist gallabuxum. Fer það gegn reglum keppninnar um klæðaburð.

Carlsen þurfti að greiða 200 dollara í sekt fyrir klæðaburðinn og var honum boðið að skipta um buxur ef hann vildi halda áfram keppni.

Frétt af mbl.is

Carlsen og Gunina heimsmeistarar í hraðskák

Stakk upp á að skipta um buxur næsta dag

Carlsen sagðist ekki ósáttur með sektina en hann stakk upp á því að hann myndi passa upp á viðeigandi klæðnað næsta keppnisdag.

Dugði það ekki til að mati Alþjóða skák­sam­bands­ins (FIDE) sem gaf honum enga aðra kosti en að skipta um buxur ef hann vildi halda áfram keppni þann daginn.

Fór það svo að Carlsen hætti keppni vegna atviksins.

• 1 blogg um fréttina

Bloggað um fréttina

• Torfi Kristján Stefánsson: Gallabuxur eða bara slakur árangur?