Neita tengslum við McGregor

Írska knattspyrnufélagið Drogheda United hefur áréttað að það tengist írska bardagakappanum Conor McGregor ekki með neinum hætti eftir að hann birti mynd af sér með leikmanni liðsins í kjölfar sigurs Drogheda í írsku bikarkeppninni.

McGregor birti mynd af sér á Instagram með frænda sínum, Warren Davis, sem var ónotaður varamaður í 2:0-sigri Drogheda á Derry í bikarúrslitum í nóvember síðastliðnum.

„Okkur barst ábending um færslu á samfélagsmiðlum í tengslum við írsku bikarkeppnina. Þeir sem eru á myndinni eru náskyldir einum leikmanna okkar, sem eins og allir aðrir leikmenn liðsins höfðu aðgengi að bikarnum ásamt fjölskyldumeðlimum á mismunandi tímapunktum.

Drogheda United tengist einstaklingnum sem birti færsluna á samfélagsmiðlum ekki með neinum hætti og sömuleiðis ekki þeim vörumerkjum sem eru nefnd í færslunni,“ sagði í tilkynningu frá írska félaginu.

McGregor var í nóvember síðastliðnum dæmd­ur sek­ur í einka­máli þar sem hann var sakaður um nauðgun og lík­ams­árás.

Hin 35 ára Nikita Hand sakaði hann um nauðgun og fyr­ir að hafa gengið í skrokk á sér á hót­eli í suður­hluta Dublin í des­em­ber árið 2018.

• Blogga um frétt