Eiginkona Schumachers sendi frá sér yfirlýsingu

Corinna Schumacher, eiginkona ökuþórsins fyrrverandi Michaels Schumachers, sendi frá sér stutta yfirlýsingu eftir að fyrrverandi öryggisvörður fjölskyldunnar Markus Fritsche var dæmdur í tveggja ára skilorðsbundið fangelsi. 

Fritsche reyndi að kúga fé út úr Schumacher-fjölskyldunni en hann hótaði því að birta sjúkrasögu ökuþórsins fyrrverandi á veraldarvefnum eftir að honum var sagt upp störfum af fjölskyldunni.

Frétt af mbl.is

Schumacher-fjölskyldan ósátt við fangelsisdóminn

Vitorðsmenn Fritsche, þeir Yilmaz Tozt­ur­kan og son­ur hans Daniel Lins, fengu einnig dóma en Yilmas setti sig í sam­band við Schumacher-fjöl­skyld­una til að byrja með og reyndi að hafa af henni fé.

Ætla að áfrýja dómnum

„Við ætlum að áfrýja þessum dómi því hann er allt of vægur,“ sagði Corinna í stuttri yfirlýsingu eftir að dómur féll í málinu.

„Ég er enn þá í áfalli eftir þennan mikla trúnaðarbrest sem átti sér stað. Hann á að fá refsingu sem fælir annað fólk frá því að gera slíkt hið sama,“ bætti Corinna við í yfirlýsingunni.

Þremenningarnir fóru fram á 15 milljónir evra í skiptum fyrir sjúkrasögu Schumachers en Yilmaz Tozturkan fékk þyngsta dóminn eða þriggja ára fangelsisdóm.

• Blogga um frétt