Íþróttir | mbl | 7.4.2025 | 8:21 | Uppfært 9:54

Eitt frægasta metið er fallið

Alex Ovechkin #8 þakkar stuðninginn eftir að hann sló metið í New York. Í útileik gegn New York Islanders. AFP/BRUCE BENNETT

Kanadíska goðsögnin Wayne Gretzky er ekki lengur markahæsti leikmaðurinn í sögu NHL-deildarinnar í íshokkí.

Gretzky sem var einn frægasti íþróttamaður heimsins á sínum tíma skoraði 894 mörk á glæsilegum ferli í deildinni sem spannaði tvo áratugi.

Wayne Gretzky lengst til vinstri, æðsti maður NHL Gary Bettman, Ted Leonsis eigandi Capitals og Ovechkin. AFP/BRUCE BENNETT

Alexander Ovechkin, leikmaður Washington Capitals, sló metið í gær og hafði jafnað við Gretzky í leiknum þar á undan með því að skora tvívegis. Met Gretzky stóð í 26 ár.

Eitt merkilegasta metið í amerískum hópíþróttum er því í eigu Rússa en lengi var talið ólíklegt að met Gretzky yrði slegið. Ovechkin er 39 ára gamall og hefur einnig verið í deildinni í tvo áratugi. Hann hefur haldið vel á spöðunum til að geta slegið met sem þetta, eða á kylfunni öllu heldur.

Alex Ovechkin fagnar markinu sögulega. AFP/BRUCE BENNETT

Capitals valdi hann fyrstan í nýliðavalinu árið 2004 og Rússinn hefur heldur betur staðið undir væntingum. Hann hefur haldið tryggð við félagið og varð liðið NHL-meistari árið 2018.

Gretzky og Ovechkin eru svolítið sér á parti á listanum yfir markahæstu menn en einn leikmaður til viðbótar hefur skorað fleira en 800 mörk í deildinni en það gerði Kanadamaðurinn Gordie Howe. Alls 801. Met hans stóð í 19 ár.