„Hann fór í megrun!“ sagði íþróttafréttamaðurinn fyrrverandi Guðjón Guðmundsson, betur þekktur sem Gaupi, í Fyrsta sætinu.
Landsliðsfyrirliðinn Aron Pálmarsson snéri heim úr atvinnumennsku á síðasta ári og gekk til liðs við uppeldisfélag sitt FH en hann var í lykilhlutverki hjá liðinu sem varð Íslandsmeistari í fyrsta sinn í 13 ár á dögunum eftir 3:1-sigur gegn Aftureldingu í úrslitaeinvígi Íslandsmótsins í handknattleik.
Guðjón hafði áhyggjur af líkamlegu standi landsliðsfyrirliðans þegar hann kom heim frá Aalaborg og talaði um það í Fyrsta sætinu að landsliðsfyrirliðinn þyrfti að fara í megrun ef hann ætlaði að finna sitt besta form.
„Hann létti sig um einhver tíu kíló og mér fannst hann algjörlega frábær í vetur, bæði með FH og landsliðinu,“ sagði Guðjón.
„Hann bar þetta FH-lið uppi og án hans hefði þetta verið erfitt. Ég er ekki að segja að hann hafi gert þetta einn en að mínu mati á hann þennan Íslandsmeistaratitil skudlaust.
Hann var fenginn hingað heim til þess að sækja Íslandsmeistaratitilinn og honum tókst það,“ sagði Guðjón meðal annars.