Ýmir Örn Gíslason, landsliðsmaður í handknattleik, átti stórleik fyrir Göppingen þegar liðið vann sterkan heimasigur á Bietigheim í þýsku 1. deildinni í kvöld.
Ýmir Örn, sem er þekktari fyrir vasklega framgöngu í varnarleiknum en er þó liðtækur línumaður, var sérstaklega drjúgur í sóknarleiknum í kvöld og skoraði fimm mörk.
Var hann þriðji markahæsti leikmaðurinn í leiknum og næstmarkahæstur í liði Göppingen, sem vann sinn fyrsta sigur á tímabilinu og fór með honum upp í 14. sæti.
Fyrr í kvöld hafði Íslendingalið Gummersbach lagt Eisenach að velli, 34:32.
Elliði Snær Viðarsson skoraði tvö mörk en Teitur Örn Einarsson er frá vegna meiðsla hjá Gummersbach, sem Guðjón Valur Sigurðsson þjálfar.
Gummersbach er í fimmta sæti með tíu stig, jafnmörg og öll fjögur liðin fyrir ofan en öll eiga þau leik eða leiki til góða.