Stórstjarna Dana fékk blóðtappa

Danska handknattleiksstjarnan Mikkel Hansen glímdi við erfið veikindi þegar hann var leikmaður París SG í Frakklandi.

Eiginkona hans, Stephanie Gundelach, rifjar upp atvik í nýrri heimildamynd um Hansen, en hann lék með franska liðinu frá 2012 til 2022.

Hansen lék ekkert síðustu vikurnar hjá Parísarliðinu, áður en hann skipti yfir til Aalborg í heimalandinu.

„Við vöknuðum og sáum að læknir landsliðsins hafði reynt að hringja 30 sinnum. Við hringdum til baka og læknirinn sagði Mikkel að fara rakleiðis á spítala. Þegar þangað var komið kom í ljós blóðtappi bæði í löppinni og í lungunum.

Hann var með blóðtappa í lungunum og það er kraftaverk að þeir hafi ekki haft áhrif á hjartað og þetta hafi verið enn alvarlegra,“ sagði hún.

„Hann var mjög pirraður yfir því að enda tíu ára feril hjá PSG svona,“ bætti hún við.

• Blogga um frétt