„Það er óskandi að fólk fjölmenni á Hlíðarenda“

„Við þurfum að eiga annan eins leik og við áttum gegn þeim í fyrri leiknum ef við ætlum okkur að leggja þær að velli,“ sagði Ágúst Jóhannsson, þjálfari kvennaliðs Vals í handknattleik, í samtali við mbl.is.

Valur tekur á móti Spánarmeisturum Málaga Costa del Sol í síðari leik liðanna í 16-liða úrslitum Evrópubikarsins á Hlíðarenda á morgun en leikurinn hefst klukkan 16:30. Fyrri leik liðanna lauk með jafntefli, 25:25, á Spáni þar sem Thea Imani Sturludóttir jafnaði metin fyrir Valskonur í lokasókn leiksins.

Frétt af mbl.is

Dramatískt jafntefli Vals á Spáni

„Fyrirfram þá var þetta það lið sem við vorum að vonast til að sleppa við. Þær unnu keppnina árið 2021 og lentu í öðru sæti árið 2022. Tilfinningin er sú að við höfum komið þeim á óvart í fyrri leiknum þar sem við vorum mjög sterkar, bæði varnar- og sóknarlega. Við erum með gott lið og vonandi hittum við á góðan dag gegn þeim á morgun og náum að klára einvígið,“ sagði Ágúst.

Blóð á tennurnar

Valskonur töpuðu sínum fyrsta leik í rúmlega 500 daga í vikunni þegar liðið heimsótti Hauka í 12. umferð úrvalsdeildarinnar en leiknum lauk með fimm marka sigri Hauka, 28:23.

„Þetta tap gegn Haukum hjálpar okkur vonandi og gefur okkur smá blóð á tennurnar. Við vissum það öll að það myndi koma að tapleiknum og við töpuðum fyrir mjög góðu Haukaliði. Það er mjög stórt verkefni framundan og kannski voru leikmenn liðsins með Evrópuverkefnið í undirmeðvitundinni.

Ég er sannfærður um það að ef við fáum fullt af fólki á Hlíðarenda að þá getum við strítt spænska liðinu. Það skiptir miklu máli að fólk mæti. Við þurfum 700-900 manns á völlinn og stelpurnar eiga stuðninginn skilið. Það er óskandi að fólk fjölmenni á Hlíðarenda.“

Með mikinn sigurvilja

Ágúst lætur af störfum með liðið að yfirstandandi tímabili loknu og mun þá taka við karlaliði Vals en er það draumur hjá honum að ljúka þessu með sigri í Evrópubikarnum?

„Ég fór með liðið í undanúrslit keppninnar árið 2006 og við töpuðum þá fyrir rúmensku liði á einu marki. Ég er gríðarlega hungraður að vinna þennan leik á morgun og koma liðinu einu skrefi lengra. Ég er með mikinn sigurvilja, í öllum keppnum, og mig langar ekkert meira en í 8-liða úrslitin. Við þurfum samt að vera með báða fæturna á jörðinni og passa okkur á því að fara ekki fram úr okkur,“ bætti Ágúst Jóhannsson við í samtali við mbl.is.

• Blogga um frétt