Alltaf mikilvægt fyrir framan Íslendinga

Einar Þorsteinn Ólafsson var í stóru hlutverki í sigri Íslands á Grikklandi, 34:25, í 3. riðli undankeppni EM í handbolta ytra síðasta miðvikudag. 

Ísland er í toppsæti riðilsins með sex stig og mætir Grikklandi í Laugardalshöllinni annað kvöld. Grikkland er með tvö stig líkt og Bosnía og Georgía. 

„Við erum allir spenntir að fá að spila í Laugardalshöllinni, það gerist ekki oft. Nú þurfum við að gefa aðeins meira í, þar sem við erum að spila heima,“ sagði Einar í samtali við mbl.is. 

Heppnaðist mjög vel 

Einar Þorsteinn spilaði með prýði í vörn Íslands og var drjúgur við að stela boltanum eftir mistök Grikkja. Hann er í stærra hlutverki í þessum landsliðsglugga þar sem vantar nokkra lykilmenn í vörnina. 

„Oft er erfiðara að spila á svona útvöllum, gryfjum sem landslið eru með úti. Ég var ánægður að við náðum að spila vel þar, það er ekki alltaf sjálfsagt. Ég reyndi að gefa 110% í leikinn. 

Grikkir gerðu fullt af mistökum í sókn og við náðum að nýta okkur það með því að vera ekki að gera mistök í vörninni. 

Það heppnaðist mjög vel, sérstaklega í fyrri hálfleik,“ bætti Einar við.

Býstu við því sama á morgun varðandi uppstillingu?

„Ekki hægt að vita, sjáum hvað gerist. Ég býst við því að Grikkirnir komi með betra skipulag og skot að utan.“

Hvað viljið þið fá úr leiknum á morgun? 

„Stóran sigur og spila vel fyrir framan Íslendinga,“ sagði Einar Þorsteinn enn fremur. 

• Blogga um frétt