Sterkur sigur Færeyinga

Færeyjar höfðu betur gegn sterku liði Hollands, 32:31, í F-riðli í undankeppni EM 2026 í Hollandi í dag.

Fyrri leikur liðanna fór 32:32 í Færeyjum síðastliðinn miðvikudag.

Færeyjar eiga góða möguleika á sæti á EM en þeir tóku toppsætið af Hollendingum með sigrinum og eru með fimm stig. Holland er í öðru sæti með fjögur.

Leikurinn var jafn og spennandi frá upphafi og staðan í hálfleik var 15:15. Samir Benghanem, sem hefur spilað rúmlega 60 leiki fyrir hollenska landsliðið, fékk beint rautt spjald á lokamínútum fyrri hálfleiks og þurfti liðið að vera án hans í seinni hálfleik.

Færeyingar tóku forystuna snemma í seinni hálfleik og komust mest fjórum mörkum yfir. Hollendingar minnkuðu muninn niður í eitt mark á lokamínútu leiksins og gerðu leikinn mjög spennandi.

Hollendingar spiluðu góða vörn í stöðunni 32:31 fyrir Færeyjum, unnu boltann og tóku leikhlé þegar nokkrar sekúndur voru eftir af leiknum. Færeyingar lokuðu vel og heimamenn náðu ekki skoti á markið áður en tíminn rann út.

Elias Ellefsen á Skipagötu var markahæstur fyrir gestina með átta mörk og Óli Mittun skoraði sex mörk.

Hjá Hollandi var Rutger ten velde markahæstur með átta mörk og Dani Baijens skoraði sex.

• Blogga um frétt