Stjarnan styrkir sig

Hand­knatt­leiks­deild Stjörn­unn­ar hef­ur samið við þær Rakel Guðjóns­dótt­ur og Anítu Björk Val­geirs­dótt­ur um að leika með liðinu næstu tvö tíma­bil.

Rakel er 24 ára vinstri hornamaður sem kem­ur frá Sel­fossi þar sem hún hef­ur leikið all­an sinn fer­il.

„Árin 2017-2019 þjálfaði ég Rakel í hand­knatt­leiks aka­demíu á Sel­fossi svo ég þekki vel til henn­ar. Hún er öfl­ug­ur hornamaður með góða skot­tækni ásamt því að vera mjög vinnu­söm.

Það er mjög mik­il styrk­ing fyr­ir okk­ur í Garðabæn­um að fá hana og mik­il til­hlökk­un að fá að vinna aft­ur með henni í hand­bolt­an­um,“ sagði Pat­rek­ur Jó­hann­es­son þjálf­ari Stjörn­unn­ar í til­kynn­ingu.

Mjög spenn­andi leikmaður

Aníta Björk er 23 ára leik­stjórn­andi sem kem­ur frá FH þar sem hún lék und­an­far­in þrjú ár. Aníta Björk er úr Vest­manna­eyj­um og hóf meist­ara­flokks­fer­il­inn með upp­eld­is­fé­lag­inu ÍBV.

„Mjög spenn­andi leikmaður sem við erum að fá til okk­ar, sterk í stöðunni einn á einn og með með góða yf­ir­sýn sem miðjumaður.

Aníta er góð viðbót við okk­ar lið, ánægju­legt að fá Eyja­konu til okk­ar því leik­menn sem koma þaðan gefa alltaf 100% í leik­inn, það kann ég vel að meta,“ sagði Pat­rek­ur.

• Blogga um frétt