Ísland dróst gegn sterkum andstæðingum

Dregið var í riðla í undan­keppni heims­meist­ara­móts karla í körfu­bolta 2027 í Kat­ar í dag en loka­mótið fer fram í Ar­ab­a­rík­inu frá 27. ág­úst til 12. sept­em­ber.

Ísland dróst í D-riðil ásamt Ítal­íu, Lit­há­en og Bretlandi. Þrjú efstu liðin í riðlin­um fara áfram í næsta stig riðlakeppn­inn­ar.

Ísland var einnig með Ítal­íu í undan­keppni EM og vann stór­kost­leg­an útisig­ur 25. nóv­em­ber á síðasta ári, 81:74. Ítal­ía vann í Laug­ar­dals­höll þrem­ur dög­um fyrr, 95:71.

Ítal­ía hef­ur unnið tíu verðlaun á loka­mót­um EM í gegn­um tíðina og Lit­há­en sjö. Lit­há­en vann síðast silf­ur árið 2015. Einu verðlaun Lit­há­ens á HM var brons árið 2010. Ítal­ía hef­ur tíu sinn­um spilað á loka­móti HM en ekki unnið til verðlauna.

Bret­ar hafa fimm sinn­um verið með á loka­móti EM og alls unnið fjóra leiki. Bret­land hef­ur þó aldrei spilað á loka­móti HM.

Ísland spilaði á loka­mót­um EM 2015 og 2017 en hef­ur aldrei spilað á loka­móti HM. Þá á liðið enn eft­ir að fagna sigri á loka­móti.

• Blogga um frétt