Íþróttir | Ólympíuleikar | mbl | 2.8.2024 | 23:00

Vésteinn reiður: Hvað er að þessu fólki?

Vésteinn Hafsteinsson var vægast sagt ekki sáttur. Kristinn Magnússon

Vésteinn Hafsteinsson afreksstjóri ÍSÍ er vægast sagt ósáttur við skipulag þríþrautakeppninnar á Ólympíuleikunum í París en Guðlaug Edda Hannesdóttir var á meðal keppenda í greininni, sem fór fram í miðborginni.

Mikil óvissa ríkti um keppnina, þar sem sundhluti hennar fór fram í ánni Signu. Signa var á mörkum þess að vera of menguð til að synda í og fékk Edda ekki að vita að keppnin hennar færi fram á réttum tíma nema örfáum klukkutímum á undan.

„Ég er reynslubolti sem hefur farið á ellefu Ólympíuleika og þetta toppar listann hjá mér af rugli. Þetta er algjörlega til háborinnar skammar fyrir Ólympíuleikana, fyrir ólympíusambandið og alþjóðlega þríþrautasambandið.

Guðlaug Edda Hannesdóttir í keppninni í þríþraut. mbl.is/Kristinn Magnússon

Ég skil ekki hvernig er hægt að koma svona fram við íþróttafólkið. Svo var verið að íhuga að leggja niður eina af greinunum á sjálfum Ólympíuleikunum þar sem fólk er búið að vera að undirbúa sig í mörg ár.

Svo kom þetta endanlega í ljós klukkan 4 í nótt þegar mótið byrjar klukkan 8. Þetta er efst á rugllistanum. Ég hef aldrei upplifað aðra eins þvælu. Ég sem fyrrverandi þjálfari og núverandi afreksstjóri spyr, hvað eiginlega er að þessu fólki? Ekki bara þríþrautasambandinu heldur alþjóðlegu ólympíunefndinni,“ sagði Vésteinn með eldmóðinn á sínum stað.

Guðlaug Edda Hannesdóttir synti í Signu. mbl.is/Kristinn Magnússon

Hann hélt svo áfram:

„Það er svæði hérna í Poissy, 30 kílómetrum frá miðborginni, þar sem er keppt á heimsmeistaramótum. Það datt engum í hug að fara þangað því það var ekkert plan b. Þetta er gjörsamlega það versta sem ég man eftir og ég hef fengið að upplifa ýmislegt. Það er stórt spurningamerki í höfðinu á mér sem skilur ekki hvað er að gerast í höfðinu á þessu fólki.

Hvernig getur alþjóðlega þríþrautasambandið samþykkt þetta og samþykkt að láta vita um miða nótt hvort það sé keppni eftir nokkra tíma? Þetta er til háborinnar skammar,“ sagði Vésteinn.