Hagnaður nýsköpunarfyrirtækisins Nox Medical nam rúmlega 5.8 milljónum evra árið 2023, eða um 864 milljónum króna. Heildartekjur félagsins voru um 33.9 milljónir evra og jukust um 7,3% milli ára. Eignir félagsins námu samkvæmt efnahagsreikningi 40,2 milljónum evra og jukust um 18% milli ára.
Þetta má sjá í ársreikningi félagsins.
Þar kemur einnig fram að rekstrargjöld hafi numið 15.2 milljónum evra. Þar af var kostnaður vegna þróunar og rannsókna um 40%, en félagið ber engar langtímaskuldir við lánastofnanir.
Félagið er leiðandi í þróun lækningartækja sem notuð eru til greininga á svefnröskunum, en í ársreikningnum kemur fram að umtalsverður vöxtur hafi verið hjá félaginu síðastliðið ár. Hann megi rekja til aukinnar eftirspurnar á vörum þess á öllum mörkuðum og að vöxturinn hafi meðal annars verið knúinn áfram af vöruþróun og aukinni markaðshlutdeild.
Í ársreikningnum kemur einnig fram að rekja megi helstu áhættuþætti rekstursins til stríðins í Úkraínu, sem hafi haft áhrif til hækkunar á verði á nauðsynlegum aðföngum. Auk þess hafi síðasta ár einkenndist af töluverðum skorti á örgjörvum og öðrum íhlutum í rafeindatæki.