Viðskipti | mbl | 3.11.2024 | 12:00

Tekjutapið gæti numið milljörðum

Tekjutap hafnarsjóðs Múlaþings gæti numið 120 milljónum króna á ári ákveði stjórnvöld að afnema tollfrelsi á skemmtiferðaskip. mbl.is

Frigg Jørgensen, framkvæmdastjóri samtaka rekstraraðila langferðaskipa, hefur miklar áhyggjur af boðaðri skattheimtu stjórnvalda á skemmtiferðaskip. Langferðaskip eru minni skemmtiferðaskip sem sigla inn á firðina og skipta fjölmörg sveitarfélög á landsbyggðinni miklu máli.

„Löggjöfin sem fól í sér ívilnanir fyrir langferðaskip rennur út nú um áramótin, sem þýðir að frá og með 1. janúar verður lagður vaskur og tollur á langferðaskip á Íslandi. Í fyrra var niðurfellingu hennar frestað um ár og á þeim tíma átti að vinna mat á efnahagsáhrifum breytinganna, en það hefur ekki verið gert,“ segir Frigg í samtali við Morgunblaðið.

Frigg Jørgensen, framkvæmdastjóri hagsmunasamtaka rekstraraðila í langferðasiglingum. mbl.is/Anton Brink

„Áhyggjur okkar snúast ekki um að greiða auknar álögur, heldur um það að það hefur ekki verið unnið neitt mat á efnahagslegum áhrifum þessa og það á alveg eftir að útfæra gjaldtökuna. Rekstraraðilarnir hafa því fjölmargar spurningar sem við getum ekki enn svarað. Afleiðingarnar eru þær að þeir eru farnir að aflýsa ferðum á Íslandi,“ segir hún.

Frétt af mbl.is

Skemmtiferðaskipin fái svigrúm

Langferðaskipin henta smærri byggðarlögum vel og í dag og bendir Frigg á að þessi skip heimsæki 30 hafnir á Íslandi, á meðan stærri skemmtiferðaskip heimsækja aðeins fjórar hafnir. Það eru því á þriðja tug hafna sem reiða sig á langferðaskipin og því mikið í húfi fyrir mörg byggðarlög að greitt verði út óvissunni og efnahagsáhrif metin áður en endanleg ákvörðun er tekin.

Fallið verði frá álagningu eða henni frestað

Björn Ingimarsson, hafnar- og sveitarstjóri í Múlaþingi, hélt erindi á fjármálaráðstefnu sveitarfélaga á dögunum um tollfrelsi skemmtiferðaskipa.

Í erindinu rifjar Björn upp að ívilnunum skemmtiferðaskipa í innanlandssiglingum hafi verið komið á árið 2012 með það að markmiði að efla bæði atvinnulíf og tekjumöguleika hafna á landsbyggðinni, með auknum farþegaskiptum, dreifðari skipaumferð á fleiri hafnir og lengri dvöl þeirra við landið. Hann segir ákvörðunina hafa leitt af sér jákvæða þróun í takt við það sem stefnt var að.

„Haldi menn sig við þá ákvörðun að afnema tollfrelsi um næstkomandi áramót mun það hafa í för með sér töluvert tekjutap,“ segir hann.

Frétt af mbl.is

Óvissan farin að hafa afleiðingar

Fyrir hafnarsjóð Múlaþings yrði tekjutap 120 milljónir á ári, sem skipti lítið sveitarfélagið miklu máli. Honum reiknast til að neikvæð áhrif á atvinnulíf í Múlaþingi myndu nema 1-1,5 milljörðum á ári, og á annan tug milljarða heilt yfir landið.

Hann bendir á að ef hringsiglingar leggist af muni það ekki skila ríkissjóði tekjum en hafa mikil neikvæð áhrif, mest á landsbyggðinni.

Björn Ingimarsson, sveitarstjóri Múlaþings og hafnarstjóri í sveitarfélaginu. Ljósmynd/Aðsend

Björn vill að fallið verði frá þessari ákvörðun og í staðinn verði komið á samræmdri gjaldtöku á alla komufarþega til landsins. Þá leið megi útfæra með einföldum hætti.

„Verði ekki fallist á að falla frá þessari ákvörðun finnst mér eðlilegt að þessu verði aftur frestað um að minnsta kosti tvö ár og menn gefi sér tíma og fari í greiningarvinnu, vinni faglega og meti áhrif af þessari ákvörðun, haldi menn sig við hana,“ sagði Björn í lok erindis síns.

Umfjöllun þessi er hluti af fréttaskýringu sem birtist í laugardagsblaði Morgunblaðsins.