Segir rangt að skipt verði um stjórnendur

Nýsköpunarfyrirtækið Controlant tilkynnti í síðustu viku að það hefði lokið 35 milljóna dala fjármögnun. Hún samanstendur af 25 milljónum dala í formi nýs hlutafjár frá lífeyrissjóðunum Birtu, Gildi, Almenna og ýmsum einkafjárfestum ásamt 10 milljóna dala lánsfjármögnun frá Arion banka. Fjármögnunarferlið hefur staðið yfir frá því síðasta vor en líkt og ViðskiptaMogginn fjallaði ítarlega um á dögunum hefur Controlant glímt við mikla rekstrarerfiðleika að undanförnu og hefur gripið til umfangsmikilla hagræðingaraðgerða og sagt upp yfir annað hundrað starfsmönnum.

Ólafur Sigurðsson, framkvæmdastjóri Birtu lífeyrissjóðs, segir í samtali við ViðskiptaMoggann að Birta hafi tekið ákvörðun um að fjárfesta á þeim grundvelli að það sé vaxandi markaður fyrir þjónustu Controlant og fyrirtækið bjóði upp á framúrskarandi vöru.

Sölusamningar ekki fastir í hendi

Controlant hefur kynnt að fyrirtækið sé með mögulega sölusamninga í pípunum, meðal annars við danska lyfjarisann Novo Nordisk líkt og ViðskiptaMogginn hefur fjallað um. Spurður út í það atriði segir Ólafur að það hafi komið fram í fjölmiðlum að viðræður séu í gangi en að ekkert sé orðið opinbert í þeim efnum.

„Það hefur ekkert verið ákveðið enn með þessa sölusamninga. Novo Nordisk er stórt í lyfjageiranum og það er ágætis staðfesting á tækninni að þeir skuli vera komnir langt í viðræðum við þá. En það er ekkert fast í hendi hvort af þessu verður svo ég viti,“ segir Ólafur.

Í hlutafjárútboðinu sem fram fór í lok síðasta árs var gengi Controlant 105 krónur á hlut en áskriftargengið í hlutafjáraukningunni er 30 krónur á hlut að nafnvirði. Því er um umtalsverða lækkun að ræða.

Samkvæmt heimildum ViðskiptaMoggans var það kynnt fyrir mögulegum fjárfestum að stjórnendum hjá Controlant yrði skipt út og nýir fengnir inn. ViðskiptaMogginn hefur heimildir fyrir því að til standi að skipta um millistjórnendur í fyrirtækinu.

Ólafur segist ekki trúa að það standi til eins og sakir standa þó að lítið sé vitað um framtíðina.

„Ég held að það sé algjört bull, ég trúi því ekki að fyrirtækjaráðgjöf Arion banka sem sá um fjármögnunarferlið segi svona. Hluthafar kunna að hafa skiptar skoðanir en það er aftur á móti algengt að það séu gerðar breytingar á stjórn og stjórnendum hjá nýsköpunarfyrirtækjum, eins og hjá öðrum, svo það gæti orðið af því einhvern tíma,“ segir Ólafur.

Lítill hluti af eignasafni

Ólafur segir að fjárfesting lífeyrissjóðsins í Controlant sé aðeins lítill hluti af eignasafni sjóðsins.

„Það er aðeins um að ræða 0,3% af heildareignum okkar. Þetta er engu að síðu fjárhæð sem skiptir máli og við værum ekki að fjárfesta nema við teldum að fyrirtækið ætti framtíð fyrir sér. Það tekur tíma að byggja upp stöndugt nýsköpunarfyrirtæki og það er eðlilegt að fyrirtæki berjist í bökkum fyrstu árin, jafnvel í 10-15 ár áður en það fer að ganga vel,“ segir Ólafur og bendir á að saga Össurar og Marels sýni það vel. Það sé eðlilegt að hafa áhyggjur á milli ára en við verðum að temja okkur að hugsa hlutina til lengri tíma í þessum efnum.

Þið eruð ekki að henda góðum peningum á eftir slæmum?

„Nei. Við erum ekki að fjárfesta í þessu til að græða á næsta ári, þetta tekur tíma,“ segir Ólafur.

Avery Dennison, bandaríska fyrirtækið sem sér um framleiðslu á Saga-kortinu, skoðaði að koma að hlutafjáraukningu Controlant en ekkert varð úr þeirri fjárfestingu að sinni. Eins og fjallað hefur verið um bindur Controlant miklar vonir við þá lausn fyrirtækisins.

„Við veltum því ekki mikið fyrir okkur hverjir tóku ákvörðun um að fjárfesta í þessari hlutafjáraukningu og hverjir gerðu það ekki. Það voru margir fjárfestar sem voru að skoða þessa fjárfestingu og munu mögulega koma að þessu seinna,“ segir Ólafur.

Greinin birtist í ViðskiptaMogganum í dag.