Ísland er á ágætum stað

Ísland situr í 19. sæti á lista yfir stafræna samkeppnishæfni (e. digital competitiveness). Það er IMD-háskólinn í Lausanne sem gefur út listann en Ísland hækkar þó milli ára.

Sigríður Mogensen, sviðsstjóri hugverkasviðs hjá Samtökum iðnaðarins, segir í samtali við Morgunblaðið að Ísland sé á ágætum stað hvað varðar stafræna samkeppnishæfni og á nokkru betri stað en fyrir nokkrum árum.

Mælikvarðinn sé þó ekki einhlítur og margt sem sé ekki tekið inn í myndina. Hún nefnir að helstu styrkleikar Íslands séu mikil fjárfesting í rannsóknum og þróun.

„Sú staða kemur ekki á óvart og er mjög jákvæð þróun fyrir hagsæld á Íslandi til framtíðar,“ segir Sigríður og bætir við að það sé áhyggjuefni að framleiðni í hagkerfinu hafi heilt yfir ekki verið eins mikil og hjá öðrum ríkjum og það birtist skýrt í þessum niðurstöðum að þar skorum við ekki nógu hátt.

PISA dregur okkur niður

Á sama tíma draga lélegar PISA-niðurstöður í stærðfræði Ísland niður samkvæmt þessum mælikvarða. Þá eru ekki nógu margir að útskrifast úr STEAM-greinum en þarna er sá mælikvarði sérstaklega tekinn inn í myndina hvað varðar stafræna samkeppnishæfni.

„Við þurfum einnig að fjárfesta meira í fjarskiptainnviðum og þá sérstaklega öflugum gagnatengingum til Íslands og frá,“ segir Sigríður. Hún segir enn fremur að stafræn samkeppnishæfni muni ráða miklu um framtíðina.

Spurð hvað fyrirtæki og stjórnvöld geti gert til þess að ýta undir stafræna samkeppnishæfni Íslands segir Sigríður að mikilvægt sé að huga að fjárfestingu í stafrænum innviðum.

„Einnig ættum við að laða til okkar erlenda fjárfestingu í upplýsingatækni, fjarskiptum og gagnatengingum og gera áherslubreytingar í menntakerfinu til þess að tryggja hæfni og færni nemenda á þessum sviðum,“ segir Sigríður.

Greinin birtist í Morgunblaðinu í dag.