Breytingar á framkvæmdastjórn Skaga

Anna Rós Ívarsdóttir, sem gegnt hefur um árabil stöðu framkvæmdastjóra mannauðs og menningar hjá VÍS, hefur tekið við starfi framkvæmdastjóra mannauðs hjá Skaga móðurfélagi VÍS. Hún mun einnig taka sæti í framkvæmdastjórn Skaga. 

Fram kemur í fréttatilkynningu Skaga að með því að starfrækja mannauðssvið í móðurfélaginu náist fram hagræðing og samræming í rekstri samstæðunnar ásamt að styðja við þróun fyrirtækjamenningar. 

„Nú um áramótin náðum við stórum áfanga þegar tilfærsla tryggingarekstrar í dótturfélagið VÍS tryggingar hf. raungerðist. Samhliða því höfum við einnig ráðist í skipulagsbreytingar sem miða að því að bæta þjónustu og auka rekstrarhagræði innan samstæðunnar. Það er mjög ánægjulegt að fá Önnu Rós til liðs við okkur í framkvæmdastjórn Skaga. Anna Rós hefur áralanga reynslu af mannauðsmálum, sem hafa verið mikilvægur þáttur í starfsemi VÍS á liðnum árum. Það er sérstaklega ánægjulegt að öll félög innan samstæðunnar njóti nú góðs af því framúrskarandi starfi sem mannauðsteymið hefur unnið hjá VÍS á liðnum árum, “ segir Haraldur I. Þórðarson forstjóri Skaga í tilkynningunni. 

• Blogga um frétt