Andlitið búið til úr 360 starfsmönnum

Eins og landsmenn hafa vafalítið tekið eftir hefur ný talskona ráðgjafarfyrirtækisins Deloitte á Íslandi kvatt sér hljóðs með áberandi hætti upp á síðkastið, á samfélagsmiðlum og í auglýsingum í fjölmiðlum og á skiltum.

Manneskjan heitir Dagný Eva Loitte (D.E. Loitte) og er gervigreindarpersóna búin til úr 360 ráðgjöfum Deloitte á Íslandi.

„Dagný sameinar sérfræðiþekkingu allra þessara starfsmanna og miðlar henni á lifandi hátt í herferðinni Góður punktur,“ segir María Skúladóttir markaðsstjóri Deloitte í samtali við Morgunblaðið.

Gervigreindarpersónan Dagný Eva Loitte.

Agga Jónsdóttir, sköpunarstjóri hjá Auglýsingastofunni Pipar\TBWA, segir í samtali við Morgunblaðið að herferðin gangi út á að nota græna punktinn í myndmerki Deloitte.

Talað sé um góða punkta fyrir fyrirtæki, stofnanir og samfélagið til að koma á framfæri þeirri þekkingu og reynslu sem teymi ráðgjafa Deloitte býr yfir.

„Ráðgjöf þeirra er góðir punktar í alvörunni,“ útskýrir Agga. „Það er grunnhugmyndin, að sýna hina yfirgripsmiklu breidd í ráðgjafarteyminu.“

María Skúladóttir, markaðsstjóri Deloitte.

Agga segir að við vinnslu herferðarinnar hafi Pipar fengið sendar myndir af öllu starfsfólki Deloitte. „Svo tókum við fjóra og fjóra og blönduðum saman í eina persónu og svo koll af kolli. Andlit Dagnýjar er sett saman úr öllum þessum 360 andlitum. Það var í raun tilviljun að manneskjan endaði á að vera kona.“

Í herferðinni eru sem fyrr segir notaðir „góðir punktar“ frá ráðgjöfunum. „Við fengum fólk til að senda okkur góða punkta sem við nýtum svo í auglýsingum.“

Spyrja á Instagram

Agga Jónsdóttir, sköpunarstjóri/í vörumerkjavirkjun hjá Auglýsingastofunni Pipar\TBWA.

Hægt er að nálgast Dagnýju á Instagram og spyrja hana spurninga. „Ráðgjafarnir fá spurningarnar og svara þeim um hæl, en þó ekki í rauntíma.“

María segir að hugmyndin að herferðinni hafi fæðst hjá Pipar. „Við vildum finna skapandi leið til að varpa ljósi á þá fjölbreyttu þekkingu sem býr í fyrirtækinu og setja fram í auglýsingum.“

Hægt er að lesa punktana góðu á vefsíðu Deloitte. „Við setjum reglulega inn nýja góða punkta,“ segir María en hjá Deloitte starfa til dæmis sérfræðingar í sköttum, fjármálum, tækniráðgjöf, sjálfbærniráðgjöf og endurskoðun, svo eitthvað sé nefnt.