Viðskipti | mbl | 8.3.2025 | 9:50

A+ lánshæfiseinkunn Íslands staðfest

Lánshæfiseinkunnin endurspeglar mjög háa landsframleiðslu á mann og sterkan hagvöxt Íslands, sem og sterka stofnanaumgjörð og trausta efnahags- og ríkisfjármálastefnu. mbl.is/Hari

Alþjóðlega matsfyrirtækið S&P Global Ratings staðfesti nýlega A+ lánshæfiseinkunn Íslands. Eru horfur fyrir einkunnina stöðugar, að því er fram kemur á vef Stjórnarráðsins.

Lánshæfiseinkunnin endurspeglar mjög háa landsframleiðslu á mann og sterkan hagvöxt Íslands – sem hefur verið hærri en hjá flestum ríkjum sem S&P meta í Vestur-Evrópu – sem og sterka stofnanaumgjörð og trausta efnahags- og ríkisfjármálastefnu.

Þættir sem halda aftur af einkunninni eru sveiflukennt eðli íslenska hagkerfisins – sem er útsett fyrir náttúruvá, þar á meðal eldvirkni – sem og neikvæð ytri þróun sem hagkerfið hefur ekki stjórn á – eins og áhætta í alþjóðamálum, deilur um alþjóðaviðskipti og sveiflukennd viðskiptakjör.

Þá takmarkar smæð íslensks efnahagslífs skilvirkni hagstjórnar og peningastefnu, vegna áhrifa utanaðkomandi þátta sem Ísland hefur ekki stjórn á.

Hagvöxturinn muni taka við sér á næstu árum

Stöðugar horfur endurspegla mat S&P, að í kjölfar tímabundins samdráttar á árinu 2024 muni hagvöxtur á Íslandi taka við sér á næstu árum – á meðan halli á ríkisfjármálum og í viðskiptum við útlönd haldast í skefjum.

Endurspegla horfurnar einnig þá forsendu S&P að hvorki eldvirkni né spenna í alþjóðlegum viðskiptum muni hafa viðvarandi neikvæð áhrif á efnahagsstarfsemi, ríkisfjármál eða greiðslujöfnuð.

Álútflutningur er að mestu leyti til evrópskra markaða – aðallega Hollands og Þýskalands – sem dregur úr beinni áhættu vegna tolla.

Lánshæfiseinkunn gæti hækkað

Lánshæfiseinkunn ríkissjóðs gæti hækkað ef opinber fjármál landsins styrkjast meira en S&P hefur gert ráð fyrir.

Einkunnin gæti einnig hækkað ef S&P myndu telja aukna fjölbreytni gera hagkerfið viðnámsþolnara fyrir ytri áföllum, á sama tíma og núverandi spenna í alþjóðaviðskiptum minnkar án viðvarandi neikvæðra efnahagslegra áhrifa.

Lánshæfiseinkunnin gæti þó einnig lækkað, ef afkoma ríkisfjármála eða greiðslujöfnuður reynist lakari en í grunnspá S&P.

Það getur gerst til að mynda ef viðvarandi truflandi eldvirkni hamlar ferðaþjónustu landsins og vexti, eða ef Ísland yrði fyrir meiri áhrifum af spennu í alþjóðaviðskiptum eða yrði að auka verulega útgjöld til varnarmála.