Viðskipti | mbl | 28.3.2025 | 13:00

Kanadísk-íslenska viðskiptaráðið stofnað

Kanadísk-íslenska viðskiptaráðið (CAIS) var stofnað undir hatti Millilandaráðanna. Stjórn ráðsins ásamt sendiherrum og formanni stjórnar Millilandaráðanna (frá vinstri til hægri): Hilmar Guðmundsson, Slippurinn, Ársæll Harðarson, formaður stjórnar Millilandaráðanna, Jóhannes Gíslason, Geosalmo, Anne-Marie Tremblay-Quennville, Icelandair, Sigríður Dögg Guðmundsdóttir, Íslandsstofa, Guðmundur Óskarsson, Kerecis og formaður CAIS, Sæmundur K. Finnbogason, Ráðgjafi, Jenny Hill, Sendiherra Kanada á Íslandi, Rúnar Jónsson, Arion Banki, Kristjana M. Kristánsdóttir, Carbon Recycling International og Hlynur Guðjónsson, Sendiherra Íslands í Kanada. Ljósmynd/Aðsend

Þann 20.mars síðastliðinn var Kanadísk-íslenska viðskiptaráðið stofnað. Ráðið hefur það að markmiði að efla og viðhalda viðskiptatengslum á milli Íslands og Kanada auk þess að stuðla að nánari samvinnu á sviðum menntunar, menningar og viðskipta á milli landanna.

Kemur þetta fram í tilkynningu frá ráðinu.

Á stofnfundinn mættu tæplega 50 manns til að taka þátt í stofnun ráðsins. Ársæll Harðarsson, formaður stjórnar Millilandaráðanna, sagði við tækifærið; „að ljóst væri að umtalsverður áhugi sé á að dýpka tengslin milli Íslands og Kanada“.

Á fundinum fór fram kosning stjórnar, sem mun leiða starf ráðsins á komandi árum og var Guðmundur Óskarsson hjá Kerecis kjörinn formaður.