Viðskipti | mbl | 28.3.2025 | 9:41

Tímamót í sögu Eyris Invest

Feðgarnir Þórður Magnússon og Árni Oddur Þórðarson. mbl.is/Eggert Jóhannesson

Eyrir Invest hf. fagnar 25 ára afmæli sínu á þessu ári og stendur á merkum tímamótum. Á aðalfundi félagsins sem haldinn var í gær, þann 27. mars 2025, samþykktu allir hluthafar félagsins tillögu stjórnar um lækkun hlutafjár með greiðslu til hluthafa. Tillagan var í samræmi við niðurstöðu valfrjáls tilboðs til hluthafa um þátttöku í fyrirhugaðri hlutafjárlækkun og nam þátttaka hluthafa í hlutafjárlækkuninni um 91% af útistandandi hlutafé. Allir hluthafar félagsins kusu að taka þátt í tilboðinu að hluta eða öllu leyti.

Eyrir Invest var stofnað árið 2000 af Þórði Magnússyni og Árna Oddi Þórðarsyni. Síðar bættust við aðrir hluthafar, þar á meðal fjársterkir einkafjárfestar og stofnanafjárfestar. Eftir hlutafjárlækkunina verða stofnendur Eyris Invest einu hluthafar félagsins með jafnan eignarhlut, Þórður Magnússon í eigin nafni og Árni Oddur Þórðarson í gegnum eignarhaldsfélögin Sex álnir ehf. og 12 Fet ehf. sem eru að fullu í hans eigu.

„Við fögnum niðurstöðu aðalfundar sem við teljum afar farsæla lausn fyrir alla hluthafa. Þetta eru mikilvæg tímamót í sögu Eyris Invest. Fyrir hönd stjórnar vil ég þakka hluthöfum og samstarfsaðilum fyrir gott og farsælt samstarf á undanförnum misserum. Við hlökkum til að fylgjast með félaginu á komandi árum.“ segir Friðrik Jóhannsson, stjórnarformaður Eyris Invest.

Endurgjald lækkunarinnar er í formi hlutabréfa í JBT Marel Corporation og Fræ Capital hf., í hlutfalli við eignarhlut í Eyri Invest. Félagið afhendir hluthöfum 3.032.714 hluti í JBT Marel og mun að loknu uppgjöri eiga 284.948 hluti sem samsvarar 0,55% eignarhlut í JBT Marel. Eyrir Invest gerði upp allar skuldbindingar við lánveitendur í janúar og er skuldlaust.

Eyrir Invest stofnaði félagið Fræ Capital í þeim tilgangi að taka yfir sprotastarfsemi félagsins og einfalda uppgjör við hluthafa þess. Fræ Capital fer nú með eignarhluti í óskráðum félögum og sjóðum sem áður voru í eigu Eyris. Fræ Capital er vel fjármagnað og í sterkri stöðu til framtíðar.

Eyrir Invest var kjölfestufjárfestir í Marel frá árinu 2005 og hafði lykiláhrif á vöxt og þróun félagsins. Á þeim tíma jukust tekjur Marel úr 129 milljónum evra í yfir 1.700 milljónir evra og starfsmannafjöldi úr 800 í yfir 7.000 í yfir 30 löndum. Á sama tímabili skilaði Marel ávöxtun til hluthafa sem var sambærileg við bestu hlutabréfavísitölur í Bandaríkjunum og Evrópu. Samruni Marel og JBT var í samræmi við langtímasýn Eyris Invest fyrir áframhaldandi vöxt Marel. Sameinað félag JBT Marel er leiðandi alþjóðlegur framleiðandi á búnaði, samþættri tækni og þjónustu fyrir matvæla- og drykkjarvöruiðnaðinn.

Stjórn Eyris Invest var endurkjörin á aðalfundi en í kjölfar uppgjörs við fráfarandi hluthafa verður boðað til hluthafafundar þar sem ný stjórn tekur við.