Framleiðslan þáttaskil

Eldur Ólafsson, forstjóri Amaroq Minerals, segir í tilkynningu vegna ársuppgjörs félagsins að fyrsta framleiðsla gulls marki mikilvæg þáttaskil.

„Síðan þá hefur áhersla okkar verið á að auka við stöðugleika í framleiðslu og námurekstri. Veðurtengdar áskoranir, þar á meðal nokkrir stormar í Nalunaq í desember, gerðu það að verkum að tafir urðu á framkvæmdum við vinnslustöðina. Við höfum áður greint frá því að við gefum okkur allt árið 2025 til að koma framleiðslunni upp í fulla getu upp á 300 tonn á dag,“ er haft eftir Eldi í uppgjörstilkynningunni.

„Við höfum teiknað upp umfangsmiklar rannsóknir á öðrum leyfum okkar fyrir árið 2025. Sér í lagi í Nanoq, þar sem við erum með áætlun um víðtækar rannsóknarboranir. Möguleikar Grænlands þegar kemur að auðlindum, sem og nálægð við helstu hrávörumarkaði, gera þetta að afar spennandi tíma til að vera stærsti leyfishafi í Suður-Grænlandi,“ kemur enn fremur fram.

Fram kemur í uppgjörinu að eftir lok fjórðungsins hafi Amaroq fengið niðurstöður úr uppfærðu auðlindamati í Nalunaq, sem sýndi fram á 51% aukningu á gullmagni í rúmlega 484 þúsund únsur, sem styður við mikla vaxtarmöguleika námunnar. Sér í lagi eykur þetta væntan líftíma námunnar úr sex árum í tíu ár.