Formúlan gangi ekki upp

Hvort tveggja er ári fyrr en fyrri áætlun gerði ráð fyrir, að því er segir í tilkynningu.

Þar segir að á tímabili fjármálaáætlunar sé gert ráð fyrir hóflegum útgjaldavexti ríkissjóðs, að jafnaði 1,6% að raunvirði á ári.

Valdimar Ármann, fjárfestingastjóri Arctica sjóða, segir í samtali við Morgunblaðið að stóra myndin sé í rauninni svipuð og var kynnt í fjármálaáætlun fyrri ríkisstjórnar í fyrra.

„Það er jákvætt að sjá heildarafkomuna detta í plús á tímabilinu en að sama skapi eru fjárfestingar og vaxtagjöld stór biti af heildarútgjöldum. Lánsfjárjöfnuðurinn er þungur baggi á ríkissjóði og mikil endurfjármögnun fram undan,“ segir Valdimar og bætir við að gera þurfi betur.

„Það eru sömu áhyggjuefni uppi og hjá fyrri ríkisstjórn. Ríkissjóður þarf að gera miklu betur í afkomubata sökum hárra vaxta,“ segir Valdimar.

Hann segir að í raun sé erfitt að sjá formúlu ríkisstjórnarinnar um hagræðingu í ríkisrekstri ganga upp samhliða boðuðum útgjaldaaukum.

„Það er hins vegar jákvætt að fjármálaráðherra skuli hafa boðað takmarkaða notkun á fjáraukalögum. Það gefur til kynna að hann vilji að staðið verði við þessa áætlun. Slík vinnubrögð munu auka trúverðugleikann og verður vert að fylgjast vel með því,“ segir Valdimar.

Greinin birtist í Morgunblaðinu í morgun.