Þjóðhagsvarúð skapar stöðugri tekjur

Hann sagði að árið 2019 hefðu hrein­ar vaxta­tekj­ur hinna þriggja kerf­is­lega mik­il­vægu banka verið 100 millj­arðar króna. Á síðasta ári voru þær 150 millj­arðar. Þetta er 16% aukn­ing að raun­v­irði. Á sama tíma hefði rekstr­ar­kostnaður auk­ist um sjö millj­arða króna, eða lækkað um 19% að raun­v­irði.

„Þannig lækkaði kostnaðar­hlut­fall bank­anna miðað við reglu­leg­ar tekj­ur úr 57% 2019 í 43% á síðasta ári. Vaxtamun­ur­inn er nokk­urn veg­inn sá sami. Þetta er ekk­ert annað en bylt­ing í ís­lensk­um banka­rekstri! Því er held­ur ekki að undra að arðsemi bank­anna þriggja hafi verið helm­ingi betri hin síðustu fjög­ur ár en næstu fjög­ur þar á und­an. Á ár­un­um 2017 til 2020 var meðalarðsemi bank­anna 5,7% en 11,7% á ár­un­um 2021 til 2024,“ sagði hann í ræðu sinni.

Hann sagði að góð af­koma og öfl­ug þjóðhags­varúð færu því sam­an og hann gæti ekki stillt mig um að vitna í loka­orð Birtíngs eft­ir Voltaire (í þýðingu Hall­dórs Lax­ness) um að „maður verður að rækta garðinn sinn“.

„Ég fæ ekki bet­ur séð en að stóru bank­arn­ir þrír hafi náð undra­verðum ár­angri í gróðri og garðrækt á sín­um eig­in heimareit­um á síðustu fimm árum – og jafn­framt að ótal tæki­færi séu enn fyr­ir hendi. Ég vil hér und­ir­strika að besti grunn­ur­inn fyr­ir traustri arðsemi fjár­mála­kerf­is­ins til langs tíma er hag­stjórn er trygg­ir stöðug­leika. Sú staðreynd ætti að vera bæði skýr og aug­ljós – þetta er lexía sem við ætt­um að hafa lært mörg­um sinn­um. Kjarni máls­ins er þessi: Öflug þjóðhags­varúð og fjár­mála­eft­ir­lit skapa stöðugri tekj­ur fyr­ir fjár­mála­kerfið og minnka lík­ur á út­lána­töp­um og kollsteyp­um,“ sagði Ásgeir.