Hagnaður Heima 1,4 milljarðar króna

Hagnaður fast­eigna­fé­lags­ins Heima var 1,4 millj­arðar króna á fyrsta fjórðungi þessa árs sam­an­borið við 3,9 millj­arða króna á sama tíma­bili í fyrra. Þetta kem­ur fram í nýbirtu upp­gjöri fé­lags­ins.

Fjár­fest­inga­eign­ir fé­lags­ins voru bók­færðar á 194 millj­arða króna. Mats­breyt­ing fjár­fest­inga­eigna nam um 1,5 millj­örðun króna á fyrstu þrem­ur mánuðum árs­ins.

Rekstr­ar­tekj­ur námu 3.686 millj­ón­um króna fyrstu þrjá mánuði árs­ins og þar af námu leigu­tekj­ur 3.486 millj­ón­um króna Leigu­tekj­ur hafa hækkað um 4,3% sam­an­borið við sama tíma­bil 2024, en nokkr­ar breyt­ing­ar hafa orðið á eigna­safn­inu á milli ára sem hafa áhrif á leigu­tekj­ur. Þegar leiðrétt er fyr­ir áhrif­um vegna seldra eigna er hækk­un­in um 5,9%, sem jafn­gild­ir um 1,2% raun­aukn­ingu. Rekstr­ar­hagnaður fyr­ir sölu­hagnað, mats­breyt­ingu og af­skrift­ir (EBITDA) var 2.449 millj­ón­ir króna sem sam­svar­ar 3,2% aukn­ingu sam­an­borið við sama tíma­bil 2024.  

Fjár­hags­staða fé­lags­ins er sterk og fjár­hags­leg skil­yrði vel inn­an marka lána­skil­mála. Eig­in­fjár­hlut­fall er 31,9% (skil­yrði 25%) og skuld­setn­ing­ar­hlut­fall 62,8%. Í lok tíma­bils­ins var hand­bært fé 5.113 millj­ón­ir króna og auk þess hafði fé­lagið aðgang að ónýtt­um lánalín­um að fjár­hæð 4.700 millj­ón­ir króna í lok tíma­bils­ins.

Bankalán sem voru á gjald­daga 2026 hafa verið end­ur­fjármögnuð og fær­ist loka­gjald­dagi til árs­ins 2031. Að þeirri end­ur­fjármögn­un lok­inni eru eng­ar skuld­ir á loka­gjald­daga á ár­un­um 2025-26 fyr­ir utan 1.240 millj­óna króna skulda­bréfa­flokk á gjald­daga í júlí á þessu ári.

Skoða tæki­færi til sölu eigna 

Haft er eft­ir Hall­dór Benja­mín Þor­bergs­syni for­stjóra Heima í til­kynn­ingu að rekst­ur­inn hafi gengið vel og sé í takti við metnaðarfull­ar áætlan­ir.

„Við finn­um fyr­ir mik­illi eft­ir­spurn eft­ir at­vinnu­hús­næði, sér­stak­lega á kjarna­svæðum Heima. Tekju­vöxt­ur leigu­tekna er 4,3% miðað við sama tíma­bil í fyrra. Sala eigna utan kjarna­svæða fé­lags­ins dreg­ur úr tekju­vexti milli ára, en raun­tekju­vöxt­ur á sam­bæri­legu eigna­safni milli ára er 1,2%. Fé­lagið skoðar ætíð tæki­færi til sölu til­tek­inna eigna jafnt og ytri fjár­fest­ing­ar og hef­ur heild­ar­fer­metr­um í eigna­safn­inu fækkað um tæp 2% frá árs­lok­um 2022 með stefnumiðaðri eigna­sölu. Á ár­inu 2024 seldi fé­lagið eign­ir fyr­ir 3,3 millj­arða þar sem verðið var að meðaltali ríf­lega 10% yfir bók­færðu virði. Við horf­um með til­hlökk­un til næstu miss­era og sjá­um þar fjöl­mörg tæki­færi til auk­inn­ar verðmæta­sköp­un­ar fyr­ir hag­hafa fé­lags­ins,“ er haft eft­ir Hall­dór í til­kynn­ingu.

• Blogga um frétt